Farmakodinamikası
Ferveflunun effekti 3 farmakoloji xüsusiyyətlə əlaqədardır:
- Antihistamin təsiri – rinoreya və asqırma tutmalarının qarşısı alınır.
- Qızdırmasalıcı və ağrıkəsici təsiri – qızdırma və ağrı (baş ağrısı, mialgiya) azalır.
- Orqanizm tərəfindən askorbin turşusu itkisinin kompensasiyası.
Farmakokinetikası
Parasetamol
Sorulması
Parasetamol tez və tam şəkildə absorbsiya olunur. Plazmada maksimal konsentrasiyaya 30-60 dəqiqədən sonra çatır.
Paylanması
Parasetamol orqanizmin bütün toxumalarına tez paylanır. Qanda, ağız suyunda və plazmada konsentrasiyaları müqayisə edilə bilər. Qan plazmasının zülalları ilə zəif birləşir.
Metabolizmi
Parasetamolun qaraciyərdə metabolizmi yavaş gedir. Parasetamol əsasən qaraciyərdə iki yolla metabolizə olunur: qlükuronlaşma və sulfatlaşma. Terapevtik diapazondan yuxarı dozalarda sulfatlaşmanın sürətlə doyma prosesi baş verir.
Digər daha az əhəmiyyətə malik metabolizm yolu sitoxrom P 450 iştirakı ilə aralıq toksik birləşməyə (N-asetilbenzoxinonimin) qədər metabolizmə uğrayır ki, bu da, normal şəraitdə bərpa olunmuş qlutation vasitəsilə tez zərərsizləşdirilir və sistein və merkaptopurin ilə birləşdikdən sonra sidiklə xaric olunur. Doza həddinin aşılması zamanı bu metabolitin miqdarı arta və qaraciyər hüceyrələrini zədələyə bilər.
Eliminasiyası
Preparat sidiklə xaric olunur. Qəbul edilən dozanın 90%-i 24 saat ərzində sidiklə, əsasən qlükuron (60-80%) və sulfat konyuqatlar (20-30% arasında) şəklində ifraz olunur. 5%-dən az hissəsi dəyişilməmiş olaraq xaric olunur. Yarımxaricolma dövrü təxminən 2 saatdır.
Patofizioloji hallar
Ağır böyrək çatışmazlığı olan pasiyentlərdə (kreatinin klirensi 10 ml/dəqiqədən az) parasetamolun və onun metabolitlərinin eliminasiyası ləngiyir. Yaşlı pasiyentlərdə konyuqasiya qabiliyyəti dəyişmir.
Feniramin maleat
Feniramin maleat mədə-bağırsaq traktında yaxşı sorulur. Qan plazmasından yarımxaricolma dövrü 1-1,5 saat təşkil edir. O, toxumalarla böyük oxşarlığa malikdir və əsasən böyrəklər vasitəsilə xaric olur.
Askorbin turşusu
Askorbin turşusu həzm traktında yaxşı sorulur. O, orqanizmə lazım olan miqdardan artıq daxil olduqda, onun qalan hissəsi sidiklə xaric olur.